我的網誌清單

2017年3月27日星期一

鐵飯碗

同王子傾開,我哋都發覺,三色貓最近呢個月,有越來越曳嘅趨勢。


唔知係咪佢覺得試用期過咗,就開始鬆懈,覺得自己已經得到長期飯票,鐵飯碗咁話,咁就可以囂張啲,串啲。

終於有日我同王子搞咗個批鬥大會,數佢罪狀。

以前我忙緊嘅時候,佢會乖乖等,唔會嘈嘈閉,依家發覺我冇即時理佢,就開始大聲貓貓叫,算係投訴我,叫我唔好待慢佢。

以前王子或者我返屋企,佢會即刻出打下招呼,依家就睇下娘娘心情點,好多時都當我哋無到。

以前佢半夜三更瞓醒覺,都會靜靜地等我哋起身,唔會騷擾我哋瞓覺,依家就周不時叫醒我哋開門,俾佢出去晨運。

以前佢去完街返屋企,我哋開門比佢,佢都會meow兩聲叫我哋,算係講唔該,依家就通常唔出聲,完全唔望我哋,掂行掂過,招呼都唔打。

。。。。。。。。。

數完佢之後,我哋決定要打爛佢個鐵飯碗!!!!

第一步係口頭警告,以前我同王子都唔會責備佢,依家如果佢實在太曳,例如亂咁大聲叫,我哋就會開始嚴厲咁話佢,叫佢收聲。

唔係講笑,佢原來好醒㗎,真係分辨到語氣上嘅不同,知道我哋話佢,係識得驚,會即刻收斂,唔敢再曳落去,有一晚我責備完佢之後,佢即刻出現死狗(貓??)樣,跟住成晚都好乖好聽話。

睇嚟,無論人又好,貓又好,都係唔可以太縱容,否則就會放肆,睇嚟,我唔可以再做溫柔嘅貓家長,要開始少少虎媽嘅生涯。。。

34 則留言:

  1. 貓係比較嗲啲嘅!
    哈哈…我諗再咁縱容就容乜易變咗「公主貓」㗎,

    回覆刪除
    回覆
    1. 唔係講笑,我上排真係覺得佢開始有貓公主病。。。

      刪除
  2. 都啱嘅,寵物都要有適當教養,等佢唔好似為佢自己係主人你地係僕人先得XXD

    回覆刪除
    回覆
    1. 咪係囉,我唔會比佢咁放肆㗎

      刪除
  3. 做得好,不然,佢會得寸進尺!

    回覆刪除
    回覆
    1. 真係呀,如果依家唔矯正佢,將來真係有排自己受

      刪除
  4. 溫柔又好虎貓又好, 這個鐵飯碗牠是用定了,很窂固呢!

    回覆刪除
    回覆
    1. 哈哈,鐵飯碗係真嘅,但係碗飯有乜嘢食,福利好唔好,就睇表現啦

      刪除
  5. 你哋好犀利呀, 我諗我以前太縱我隻猫, 佢既行為就正正係三色猫咁, 不過依家佢已經係老猫, 要矯正都太遲啦.

    回覆刪除
    回覆
    1. 我就係怕佢嘅公主病越來越勁,遲啲已經救唔返,依家要將佢嘅劣根性連根拔起,咁我哋就有好日子過啦

      刪除
  6. 之前佢覺得已經食住你啦, 唔駛俾面 XD

    回覆刪除
    回覆
    1. 幻覺!完全係幻覺!佢諗都唔使諗呀

      刪除
  7. 回覆
    1. 係呀,佢哋好識用呢啲招數㗎,其實狗都識㗎

      刪除
  8. 三色貓甘曳曳係要比的顏色佢睇。但係我對自己兩隻貓就唔捨得鬧嘅,剩係識錫錫!

    回覆刪除
    回覆
    1. 我嘅政策係要錫,但係唔可以縱,我驚將來佢真係會當我無到,到時我肯定好唔順氣

      刪除
  9. 回覆
    1. 係,要錫,但係唔可以縱

      刪除
  10. 無論貓或狗都係咁樣,真係要慢慢教,不過有時教佢都唔會聽

    回覆刪除
    回覆
    1. 係,有啲個劣根性真係好強,不過我唔會慢慢教,會儘快教,唔比佢惡化落去

      刪除
  11. 回覆
    1. 係,佢要做一隻有家教嘅貓

      刪除
  12. 回覆
    1. 唔教,佢真係會越來越曳曳。。。

      刪除
  13. 三更半夜叫醒你地開門呢項,真係唔可以縱容呀!

    回覆刪除
    回覆
    1. 呢個真係好難搞,清晨鍾意出去真係佢哋天性,依家天氣暖,我就由得佢响外面玩同瞓覺

      刪除
  14. 哈...
    佢作為主人,
    一定以為自己大哂。

    回覆刪除
    回覆
    1. 哈哈,所以我呢個真主人要及時比啲顏色佢睇吓

      刪除
  15. 好耐冇見了!最近幾好嘛?😆

    回覆刪除
  16. 我隻狗狗BIBI都係咁GAR,不過我.....係會種佢^^

    回覆刪除
    回覆
    1. 我唔會囉,我諗我都有啲虎媽特性

      刪除