我的網誌清單

2016年4月30日星期六

香草陳醋低溫烤羊髀

突然好想食羊。
想食羊,就要山長水遠去土超買啦,佢哋啲羊肉品質最一流。
小菜園嘅新種香草開始有收成,剪啲嚟用,今日整香草陳醋低溫烤羊髀。
隻羊髀有1.8kg,我用咗4湯匙橄欖油,6粒蒜頭切碎,1.5茶匙鹽,3湯匙意大利陳醋,香草黑椒粉紅椒粉各適量,拌勻後用來醃羊髀3小時。
焗前羊髀回溫1小時以上,加入蔬菜, 1/4茶匙鹽,拌一拌,120度焗一個半小時。

2016年4月29日星期五

博物館之夜(9)

講開警察會用嘅動物,大家應該會即時諗到警犬,其次可能諗到馬。
有見過警豬嗎?事實上,不同嘅動物都可以成為officer,例如貓,馬騮,老鼠,甚至昆蟲如蜜蜂都可以。
咁豬,有乜優勢呢?佢嘅嗅覺其實比狗好,而且唔會好似狗咁吠,响大自然搜索嘅能力,亦比狗強。
但係豬唔夠服從性,有無狗咁靈活,識得同人合作,更加冇嘅係,狗可以响危險時撲出嚟保護主人,但係豬。。。你只可以自求多福啦。

2016年4月28日星期四

韓式魚生拌飯

收到新嘅魚生宅配,又可以整下魚生飯食啦。
今次整吓韓式口味,少少辣少少甜嘅韓式魚生拌飯。
我呢個係二人份量,大概係300g嘅魚生份量嘅醃料份量。
先將芝麻放白鑊內炒一會,舂/磨碎。
大碗內放進1湯匙韓式辣椒醬,芝麻碎,1/4湯匙糖,1/4湯匙蒜粉,4湯匙醬油,1湯匙麻油。

2016年4月27日星期三

九九九誰是兇手

近兩星期,發現屋企前院,經常有堆泥响石徑上。
而且經常係同一個位,清潔完,過一陣,又有。
最最最火滾係,仲破壞咗我部份已經落咗地嘅幼苗。
後來仲過份,連後院,甚至屋前都唔放過,一樣有掘過嘅痕跡,搞到我成日要去掃地。。。
於是同王子研究案情,我覺得忍無可忍,決定部分地方要圍起來,因為呢隻生物,唔知點解,好鍾意掘同一個位。
不過,還是要緝兇,同搵出原因。
王子最初覺得,兇手係松鼠,但係我已經一段日子冇見過佢哋,而且佢哋唔會日日掘同一個位嘅。。。
係雀嗎?但係我從來未見過咁有破壞力嘅雀,响花園出現喎。。。
直到有一天,兇手浮現出來啦。
第一次見佢,佢又响度翻土,好似部翻土機咁,個咀仲擔住一對唔知乜,又係搞到個石徑一角一堆泥。

2016年4月26日星期二

博物館之夜(8)

上到二樓,我哋已經有睇到嘔嘅感覺,因為實在被太多豬圍住啦。
唔講唔知,呢個係全世界最大嘅豬博物館呢,擁有超過五萬件展品!

2016年4月25日星期一

紅豆味噌

整完鷹嘴豆味噌,整味噌嘅情緒突然好高昂,見時間尚早,即刻浸豆,整另一款味噌。

2016年4月24日星期日

冬菜牛肉丸

整完鷹嘴豆味噌,就整下一樣。
下午天氣好好,發現屋企唔夠牛奶,於是出去買,遇上佢哋。

2016年4月23日星期六

鷹嘴豆味噌

星期五晚,王子同同事去玩,我見有時間,勤勤力力做咗幾件事。
首先,是為未來嘅味噌需求作準備,呢次嘅味噌,我打算用鷹嘴豆做。

2016年4月22日星期五

儲備

王子打敗仗,感冒了。
家居隔離咗兩日,佢聲稱自己痊癒,可以解除家居隔離。
同一晚,我瞓瞓下,發現有人响我隔離包雲吞同咳。。。就係咁,我又中招啦。。。堅唔抵。。。
渾渾噩噩兩日,又開始到我包雲吞同咳,今次好唔想飲洋葱止咳水,咁試下屋企嘅儲備鹹檸檬啦。
睇番個樽,原來係2012年嘅作品。

2016年4月20日星期三

椰汁咖哩車仔麵

寫咗幾日豬博物館,怕大家悶,寫返篇食嘅。
某天不能外出,有幾個包裹到,其中一個仲要係魚生宅配。
反正要等,不如整下麵,開部製麵機,整咗2kg嘅麵,夠幾日用啦。

2016年4月19日星期二

2016年4月18日星期一

2016年4月14日星期四

博物館之夜(3)

下一個節目,我哋去搭古董車。
不過唔係搭呢架,呢架淨係放响度擺。

2016年4月13日星期三

2016年4月12日星期二

新收成

天氣開始暖起來,好快又係新一年嘅夏季黃金種植期。
家中已經培育咗好多幼苗,王子又正在幫小菜園做啲diy工作,某天趁天氣好,我便幫小菜園去除部份雜草。
雖然新嘅未開始種,但係上年種嘅,因為天氣和暖,突然長大不少。
認得出它是什麼嗎?

2016年4月11日星期一

博物館之夜(2)

因為博物館之夜係一件大事,全市嘅交通都要一同配合,為咗方便參觀者,大會將各種展覽劃成區,安排不同巴士路線,令每一個展覽點都可以方便快捷咁去到。

2016年4月9日星期六

博物館之夜(1)

這一年王子生日,我提議請佢去博物館之夜。
博物館之夜係一個城裡盛大嘅活動,每一年都有舉辦,好多機構會幫手搞,除咗本地居民,仲有唔少遊客會嚟睇。

買咗門票之後,從晚上七點可以玩到凌晨兩點。
雖然名稱係博物館之夜,但其實博物館只係一部分,另外仲有藝術同文化表演,特備節目等等,大概有百幾項節目可以選擇。

我哋買好門票,就要開始排隊,第一個睇嘅係一年先會開放一次嘅地方。
呢個地方响市政廳旁邊嘅廣場中間,平日係封住,好似一般行人專用區咁,如果唔講,一定唔會知下面原來係有嘢㗎。

呢個展覽係每年最多人睇嘅,條人龍好長,開始之前半個小時,已經圍住咗成個廣場,排到去另一條馬路,見唔到龍尾啦。
我同王子無咁豬啦,早啲嚟排隊,免得要等成兩個鐘,嘥晒晚上寶貴嘅時間。

2016年4月8日星期五

Monastir (5)

最後一集嘅突尼西亞之旅啦。
响魚鱗廣場嘅最遠處,有座唔知係乜嘅建築。

2016年4月7日星期四

五香酥炸魷魚鬚

好耐冇食魷魚鬚啦,以前有時去飲茶時,我都會嗌一碟嚟食。
但係,我雪櫃有盒魷魚鬚喎,咁唔理啦,快啲解凍整啦。

2016年4月6日星期三

慶生餅

王子年年慶生,都要帶慶生餅返公司同同事慶祝。
年年都係我整,今年年頭我一早同佢講,今年你自己整啦,俾啲誠意啦,你啲同事個個都係自己整㗎。

佢初頭都話好。。。。
直到潛完水返嚟,佢就改口風, 話未諗到整乜蛋糕好,不如我幫下手。。。
幫下手??!!好似想搵我笨喎。。。

果然,最後有人縮沙,要求我整晒,其實我都估到佢係咁,皆因佢哋同事次次帶蛋糕去開心share之前個晚,放工要趕頭趕命去買材料,返屋企又要即刻開工,做到翻天覆地,無覺好瞓。

以往我都係同其他同事一樣,做點簡單嘅蛋糕,今年我決定勤力啲,做啲複雜一點,麻煩一點嘅慶生餅。

2016年4月3日星期日

Monastir (3)

行完魚市場,不如睇下其他食物啦。
本地人鍾意食豆,鷹嘴豆同呢種白豆成日見,但係佢哋需要預早浸泡先煮,咁唔想自己浸泡,就嚟幫襯呢啲已經浸好嘅。

2016年4月2日星期六

雪菜筍絲米粉

早兩個星期,大超市嘅芥蘭頭大減價,真好,又係整假雪菜嘅好時機。
去到,發覺有幾十公斤嘅芥蘭頭葉可以攞,幾十公斤喎!我無本事食得晒啦,幾公斤都ok嘅。
返到屋企,立即將佢哋洗乾淨,加入幾湯匙幼鹽揉揉,等幾個小時見葉軟化,就可以入膠袋封好。
夏天醃雪菜我會放雪櫃,趁著室外仲係好凍,我索性放室外就算啦。
時光飛逝,兩星期過去,打開膠袋檢查時,發現已經出現雪菜嘅味,便拿出其中一包整雪菜筍絲。
雪菜用清水洗5-6次,將鹽份洗走,榨乾水,切碎,白鑊用中火炒一會至乾身。

2016年4月1日星期五

魚手指

印象中小時候,我有幾樣嘢係好鐘意食嘅,一係粟米湯,二係魚手指,三係莎莉蛋糕。
小時候我不太愛吃魚,尤其係淡水魚,總覺得有泥味又腥。
但係魚手指就唔同啦,炸嘅,脆嘅,完全無魚腥味。
幸好,後來慢慢地開始鍾意食魚。