慶生餅

王子年年慶生，都要帶慶生餅返公司同同事慶祝。
年年都係我整，今年年頭我一早同佢講，今年你自己整啦，俾啲誠意啦，你啲同事個個都係自己整㗎。

佢初頭都話好。。。。
直到潛完水返嚟，佢就改口風， 話未諗到整乜蛋糕好，不如我幫下手。。。
幫下手？？！！好似想搵我笨喎。。。

果然，最後有人縮沙，要求我整晒，其實我都估到佢係咁，皆因佢哋同事次次帶蛋糕去開心share之前個晚，放工要趕頭趕命去買材料，返屋企又要即刻開工，做到翻天覆地，無覺好瞓。

以往我都係同其他同事一樣，做點簡單嘅蛋糕，今年我決定勤力啲，做啲複雜一點，麻煩一點嘅慶生餅。

春末夏初，我哋嘅莓類生果突然多起來，所以今次嘅主題係雜莓。

左邊既係雜莓朱古力千層蛋糕，個filling係紅莓，忌廉芝士，加忌廉打成的，右邊嘅係雜果撻，除咗呢度，另外仲有一個蛋糕同四件雜果撻冇入鏡，主要係俾自己屋企食。

呢批慶生餅要分兩天完成，個朱古力千層蛋糕需要雪十幾小時先食，所以前一晚一定要做好，雜果撻剛剛相反，要新鮮即日整先好食，所以前一晚只可入模，到了第二天早上才焗和冷凍，所以第二天所有慶生餅做好後，我還要去送貨，重到不得了呢。

雖然工序頗多，不過用嘅時間又不算很多，總共5小時左右吧。

同事們嘛，見到當然好高興啦，尤其係個雜莓朱古力千層蛋糕，因為咁多手工而呢度人工咁貴，外面係無得賣嘅，有好幾個同事，還打算將佢老翻一次呢。