九九九誰是兇手

近兩星期，發現屋企前院，經常有堆泥响石徑上。
而且經常係同一個位，清潔完，過一陣，又有。
最最最火滾係，仲破壞咗我部份已經落咗地嘅幼苗。
後來仲過份，連後院，甚至屋前都唔放過，一樣有掘過嘅痕跡，搞到我成日要去掃地。。。
於是同王子研究案情，我覺得忍無可忍，決定部分地方要圍起來，因為呢隻生物，唔知點解，好鍾意掘同一個位。
不過，還是要緝兇，同搵出原因。
王子最初覺得，兇手係松鼠，但係我已經一段日子冇見過佢哋，而且佢哋唔會日日掘同一個位嘅。。。
係雀嗎？但係我從來未見過咁有破壞力嘅雀，响花園出現喎。。。
直到有一天，兇手浮現出來啦。
第一次見佢，佢又响度翻土，好似部翻土機咁，個咀仲擔住一對唔知乜，又係搞到個石徑一角一堆泥。

週六，橫風橫雨，我同王子講，我搵到真兇啦，同埋，其實雀會唔會有精神病之類呢，佢做乜瘋狂咁响同一個位置掘掘掘呢？？？
當佢再次出現，王子企响落地玻璃前面，明明好近，佢都唔怕，照掘！！！超大膽啊，無法無天啊。。。
王子即刻金田一上身，研究佢，不消一會，已經師傅明白了。
原來，佢想築巢，而我家，有佢鍾意嘅「建材」。
可能時間緊迫，佢趕住完工，所以每日來來回回咁多次。
果然，整個星期六，天氣好差，但係佢依然响度搵建材，而且，佢開始少咗掘，而係響度搵一舊舊嘅枯草，王子估計，應該係用嚟做雀巢嘅軟墊，咁，應該差唔多完成囉喎。
知道佢係為咗築巢而咁瘋癲，又好似嬲佢唔落，希望佢早日入伙，唔好再嚟搞我哋啦。