雪菜筍絲米粉

早兩個星期，大超市嘅芥蘭頭大減價，真好，又係整假雪菜嘅好時機。
去到，發覺有幾十公斤嘅芥蘭頭葉可以攞，幾十公斤喎！我無本事食得晒啦，幾公斤都ok嘅。
返到屋企，立即將佢哋洗乾淨，加入幾湯匙幼鹽揉揉，等幾個小時見葉軟化，就可以入膠袋封好。
夏天醃雪菜我會放雪櫃，趁著室外仲係好凍，我索性放室外就算啦。
時光飛逝，兩星期過去，打開膠袋檢查時，發現已經出現雪菜嘅味，便拿出其中一包整雪菜筍絲。
雪菜用清水洗5－6次，將鹽份洗走，榨乾水，切碎，白鑊用中火炒一會至乾身。

加入多一點嘅油，蒜蓉，辣椒碎，唔食得辣可以唔加，炒香。

加入蠔油同糖，炒一炒，加入大半杯水，加蓋，炆至菜葉夠腍。

筍絲沖幾次水。
加入筍絲，生抽同少少老抽，炒一炒。

試味，煮多一陣就完成。

今日想食素，冇落肉絲，係食雪菜筍絲米粉，加杯咖啡就搞掂。