冬菜牛肉丸

整完鷹嘴豆味噌，就整下一樣。
下午天氣好好，發現屋企唔夠牛奶，於是出去買，遇上佢哋。

呢隻係貴價碎牛肉，貴平時普通嘅一倍，不過呢三包有四折，變咗好抵買。
唔買實在太執輸，反正屋企冇晒肉丸存貨，買嚟整返啲都好。

今次整冬菜牛肉丸，小時候，食牛丸河最鍾意加冬菜，味道真係好夾，冬菜可以將牛丸嘅鮮味提起來啊。

冬菜用大碗水浸30分鐘，加入3/4茶匙鹽，1茶匙糖，少許胡椒粉，試試味，略咸變可以。

再加入6湯匙生粉，6湯匙燕麥，3小包泡打粉(即或足夠份量嘅泡打粉），拌勻，倒入1.2kg牛肉內，用機器打到肉漿起膠，放雪櫃雪5小時以上。

牛肉丸跟豬肉丸不一樣，比較硬，我家王子唔鍾意結實嘅牛肉丸，佢鍾意鬆少少嘅，所以我會加入多一點嘅生粉同水，平衡返。

如果你鍾意實啲，肉嘅感覺勁啲嘅牛丸，可以放少啲生粉。

我怕感染食肉菌，唔用手唧肉丸，用兩隻湯匙畢來畢去，就會形成肉丸型。
預備好冷水，畢好即時放入冷水中，可以幫助牛肉定型。

中小火滾住，唔好俾佢滾起，慢慢浸熟。

兩個鍋同步浸，好快就做完，數數看，原來呢個份量整到五十幾粒牛丸喎。