博物館之夜（1）

這一年王子生日，我提議請佢去博物館之夜。
博物館之夜係一個城裡盛大嘅活動，每一年都有舉辦，好多機構會幫手搞，除咗本地居民，仲有唔少遊客會嚟睇。

買咗門票之後，從晚上七點可以玩到凌晨兩點。
雖然名稱係博物館之夜，但其實博物館只係一部分，另外仲有藝術同文化表演，特備節目等等，大概有百幾項節目可以選擇。

我哋買好門票，就要開始排隊，第一個睇嘅係一年先會開放一次嘅地方。
呢個地方响市政廳旁邊嘅廣場中間，平日係封住，好似一般行人專用區咁，如果唔講，一定唔會知下面原來係有嘢㗎。

呢個展覽係每年最多人睇嘅，條人龍好長，開始之前半個小時，已經圍住咗成個廣場，排到去另一條馬路，見唔到龍尾啦。
我同王子無咁豬啦，早啲嚟排隊，免得要等成兩個鐘，嘥晒晚上寶貴嘅時間。

排排下隊，見到有間餐廳响到送啲杯碟俾人，唔使錢任攞，仲幾靚添，有啲仲係品牌嘅紀念杯，咁啱我同王子一人一個大背囊，真係攞咗唔少，慳返唔駛買。

終於落得去啦，落去之前要先簽同意書，因為下面會有霉菌，對身體唔好。
條路濕噠噠嘅。

睇唔睇得出係乜呢？

係酒店嚟架。

呢間叫Bunkerhotel，係德國二次世界大戰嘅歷史遺物。
呢種嘅遺物，响德國不少嘅城市都有，前身係戰時嘅防空洞。

由於戰後德國嘅旅遊業迅速復甦，但係大量嘅酒店被炸毀，只剩下戰前嘅十分之一嘅床位，於是有人諗到，將呢啲防空洞改成酒店。
睇番啲相，以前睇落都幾企理㗎。

之前個入口係咁，仲有埋酒店個牌。

其實呢間酒店營運咗好耐㗎，直到1985年先結業，呢個歷史就從此長埋地下。

 呢個係以前嘅服務台同酒吧。

參觀嘅時候，佢哋仲播緊啲類似「等著你回來」嘅歌，好恐怖呀。