儲備

王子打敗仗，感冒了。
家居隔離咗兩日，佢聲稱自己痊癒，可以解除家居隔離。
同一晚，我瞓瞓下，發現有人响我隔離包雲吞同咳。。。就係咁，我又中招啦。。。堅唔抵。。。
渾渾噩噩兩日，又開始到我包雲吞同咳，今次好唔想飲洋葱止咳水，咁試下屋企嘅儲備鹹檸檬啦。
睇番個樽，原來係2012年嘅作品。

打開俾大家睇下，裡面嘅鹽已經融晒，檸檬又淋晒，我無落水浸㗎，見到嘅液體全部係來自檸檬自己嘅汁液。
呢啲液體已經成為咗果膠狀，類似好杰嘅蜜糖咁。
浸鹹檸檬我比較喜歡切片浸，雖然無咁靚，但係會快啲同慳鹽，而且用嘅時候，我通常用唔到成個檸檬，一兩片已經足夠，呢個方式會適合一般小家庭用。

真係淋晒㗎，攞一片放入杯，用叉搞兩搞，已經碎晒，變咗pat醬。

加啲熱水就飲得，據說三年以上嘅鹹檸檬先有止咳作用，我飲咗兩日，真係冇再咳，唔知係咪真係佢嘅功勞呢？？