椰汁咖哩車仔麵

寫咗幾日豬博物館，怕大家悶，寫返篇食嘅。
某天不能外出，有幾個包裹到，其中一個仲要係魚生宅配。
反正要等，不如整下麵，開部製麵機，整咗2kg嘅麵，夠幾日用啦。

真係好快，20分鐘左右，啲麵已經整完。
包裹仲係未到，咁煮麵食啦。
最近有啲實驗要做，買咗包薯仔。
其中一部分，留返嚟食，於是，琴日整咗椰汁咖哩薯仔雞翼。
整咗兩日嘅分量，今日攞返啲出嚟用，加啲湯同調味，做個車仔麵。
屋企長期種著芽菜，又攞啲嚟用，覺得呢個湯底同豆卜最夾，不過我屋企冇，但係上排自家製咗薑汁豆腐球，咁照用啦。
再加啲粟米，就係我嘅求其椰汁咖哩車仔麵。