周日午餐

好耐冇影吓食物啦。
周日，天氣好好，陽光普照，非常暖和。
午餐，快快手整返兩味。
蕃薯當造，買過幾次都好食，印象中，本地好似無蕃薯出產，平時買嘅，都係美國貨，入口嘢，所以偏貴。

這幾天，突然好想食炸蕃薯。
唔知你有冇呢個童年回憶，係細個放學時好肚餓，行過見到有炸蕃薯賣，會買返塊嚟食。
可能呢個回憶返咗嚟，突然好掛住炸蕃薯嘅味道。
我都係第一次炸蕃薯俾王子食，佢超鍾意，其中一個原因係，因為甜甜哋，佢鍾意食甜嘢。
另一碟餸係荷蘭豆牛肉炒蛋，家常菜，加少少飯，就係我哋嘅週日簡易午餐。