自製新鮮烤麩

是日，打算自製新鮮烤麩。
我哋係無新鮮烤麩賣嘅，只有乾貨，好耐好耐之前買過一次，處理嘅時候已經覺得唔對路，好似洗碗用啲海綿，煮完之後試食，果然係洗碗海綿，口感好古怪，自此，無再買過。。。
新鮮烤麩其實唔難整。
首先準備一碗暖水，加入適量酵母，少少糖，攪拌之後等一陣。
另外準備麩質蛋白粉（vital wheat gluten）同一般中筋麵粉，我用嘅係100%純嘅麩質蛋白粉，如果你買嘅麩質蛋白粉唔係100%純，就要自行調高個比例。
我用嘅比例係8：2，即係320g麩質蛋白粉，對80g中筋麵粉。

將麵粉攪拌至均勻，慢慢加入酵母水，拌勻，再搓幾下，就會成為球狀。
跟住將佢放上焗爐紙上面，用另一隻大碗將佢蓋好，放响和暖嘅地方等佢發酵至兩倍，或者兩倍半大，就可以拎去蒸，中火大概蒸35－40分鐘，唔開蓋等15分鐘左右，就可以。

取出後等佢略為涼一點，就可以搣走張焗爐紙。

睇下，中心係咁樣嘅。

跟住可以將佢搣開一舊舊，就可以用，或者用嚟儲存。

今日我會用一半，屋企有羊腩，整咗烤麩羊腩一品煲，啲烤麩吸晒羊腩嘅香味同肉味，好正呀。