Mittelalterlicher Adventsmarkt Stettenfels（2）

其實呢度都幾多嘢賣。
呢個我同王子都覺得幾過癮，响個鐵波上面整咗唔同圖案，有啲仲係人樣，跟住將火種放中間，揸住佢就可以照明，而且响黑暗中會見到圖案，我諗起武林聖火令呀，唔知仲有冇人記得呢？？？

仲有呢啲中世紀嘅廚具。

哪哪哪，呢度真係好認真㗎，呢度連賣聖誕酒，都用中世紀嘅鐵杯，我都係第一次見咋。

個城堡有城池圍住，時間尚早，仲未係好多人。

影吓個城堡先。

門口有中世紀守衛，佢哋係古惑守衛，特別鍾意整蠱老人家，我前面幾個老人家被佢哋截住，要跳返part舞被佢哋睇先放佢哋入去。

入到城堡有個中庭，好多檔口，呢檔係賣陶樂器嘅，有啲似啲西洋古裝片，啲俠士夜麻麻無嘢做，就會响個衫袋搵個樂器出嚟吹，解下悶咁啦。

呢個係全場最辛苦嘅工作人員之一，身兼多職，佢係今日嘅小丑。

仲有中世紀碌齡。

見好難碌吓，冇乜人成功。

睇吓啲保齡球樽，好別緻㗎。

呢檔係聲稱好受歡迎，年年有嘅。

佢係養鼠人呀。
啲鼠係自己養，乾淨嘅，可以摸，呢隻係巴西品種喎，好神奇，佢哋係唔會走，唔會離開張枱㗎，但係如果有帶狗隻入場，就唔可以行咁埋囉。

呢個係競猜遊戲，估吓鼠落誰家。

仲有另一個品種。

唔知你見唔見到啦。養鼠人話係蒙古品種喎。

仲有呢個地下室購買中心，不過依家有節目，一陣先嚟睇。

其實全日响唔同地點都有唔同嘅表現節目，第一個我哋睇嘅係中世紀勁歌金曲，响小教堂舉行。
佢哋真係演奏同唱番中世紀時代嘅流行曲，而且表現之前會解釋吓首歌嘅出處，作曲者，大致內容等等。
表現嘅曲目除咗有歐洲歌，仲有猶太歌，中東歌，土耳其歌等等，係以小調為主。

聽一陣歌，又夠鐘出去睇小丑表現啦，呢個表演好精彩，睇到啲細路哈哈笑。

小丑表演完，又輪到另一輯嘅勁歌金曲啦。
呢個組合又係表演中世紀流行曲，不過係以快歌為主。

跟住去睇啲細路打假獵。

啲打獵用具都好認真㗎。

見到呢檔賣嘅幾特別。

係烤全豬，我見佢不斷切，有人買就裝入盒，睇樣，就唔覺得好食囉。