鄉村紫椰菜批

是日有啲勤力，又寫下飲飲食食嘅嘢先。
某次同王子行街，見到有鄉村紫椰菜批賣，但價格高昂，而且係凍嘅，最終都無買。
不久之前，超市嘅紫椰菜大減價，便想起不如自己動手整。
我今次整嘅批比較大，所以份量會多啲，你可以根據自己個批嘅大細，深淺作調整。
攪拌機內放入兩杯麵粉，一茶匙鹽，拌勻，放入兩隻蛋，攪拌至麵粉變成淡黃色。
再慢慢加入大約2／3杯橄欖油，攪拌至剛剛吸收就可以。

倒出，用手搓幾下成團就可以，如果太乾，可以加少少奶一齊搓。

我今次想健康啲，用橄欖油整。
但係用牛油其實會香啲，不過次序會有啲唔同，牛油要先放軟，再和麵粉攪拌，最後才加入蛋攪拌。
將麵糰放入雪櫃30分鐘。

取出，慢慢用手指壓在批模中，完成後放入雪櫃備用。

紫椰菜用攪拌機切碎。

椰菜始終係瘦物，要加啲煙肉粒先好食。

 用少少油，爆香煙肉粒。

加入紫椰菜，鹽，炒至紫椰菜變軟。

熄火，等1－2分鐘，加入500g酸忌廉，4－5湯匙麵粉，黑椒碎，拌勻。

將餡料放入批皮上。

放入已預熱180度焗爐，中下層焗一小時左右，如果批比較細，大約35－40分鐘已經足夠。
取出後等15分鐘，脫模。

趁熱食先好食，呢個批，因為用咗大量紫椰菜，係甜甜地嘅。
其實隔夜之後會仲好食同入味，只要用焗爐／微波爐翻熱就可以啦。

如果你有耐性，等耐啲先切，個批嘅餡料會結在一起，椰菜唔會跌出嚟，會美觀啲。
我家王子係無耐性嘅，一見有嘢出爐就好想切佢，佢話夠熱重要過靚喎。