代步

首先祝大家雞年行大運，身體健康，萬事勝意，心想事成！！

我哋，連續幾星期，都係處於冰封狀態。
有雪嘅日子，啲細路最開心。
每逢有大雪，就即刻出去玩。
而雪橇呢種代步工具就會出現，王子都話，呢個係佢其中一個美好嘅童年回憶。

平時雪橇都係用馬去拉，咁一般城市嘅百姓家就梗係無馬，咁家長就要扮馬啦。
家長只要响前面拖住，唔駛太用力，架雪橇已經可以向前行。
唔好以為純粹係為咗啲細路呀，鄰居曾經同我講，平時帶細路去幼兒園，佢已經好有拉牛上樹feel，明明係5分鐘路程，最後半粒鐘都未到，勁谷氣，我諗，好多人都有同感。。。
落雪就更甚，啲細路一定不停响度玩，用呢招，出入迅速好多，個細路又開心，大人又唔會失控發火，大家雙贏。