Walk The Cat

三色貓嚟咗我哋屋企無幾耐之後，某天我想外出買點東西，佢死跟住，就係咁，開始咗我walk the cat嘅生涯。
Walk the dog好普遍，但係walk the cat真係少見，要睇下隻貓嘅性格。
我冇用貓帶，因為三色貓一定會唔鐘意，同埋怕佢有危險。
鄰居同附近嘅街坊見到，都覺得好驚奇，話從來未見過唔用貓帶去walk the cat，紛紛問我點訓練佢，難唔難，有乜要注意等等。
不過有啲貓主就話，佢哋都試過，係得嘅，但係就要睇下隻貓囉，大部分貓都係唔得嘅。
這天，見有時間，著好衫，大聲叫三色貓：去。街。啦。。。。。
條友即刻撲出嚟，見我着好衫，已經知道我陪佢散步，興奮不已。
睇下佢個傻樣，幾搞笑啊。。。

其實walk the cat同walk the dog有好大分別，狗同主人永遠係上下級嘅關係。
貓唔一樣，佢覺得自己同主人係同級，所以並唔係主人帶著佢行，而係同行嘅關係。
通常行嘅地方，都係離開屋企唔太遠嘅地方，以免佢害怕。
見到呢啲坑渠蓋佢就開心啦，因為有窿窿，可以俾佢望入去，滿足佢好奇心。

貓嘅警覺性好大，行行下，會望返轉頭，睇下有無危險，無事就繼續行，有時就先匿埋，等啲危險過晒先出返嚟。

好似警察咁，要檢查清楚啲樹叢有冇老鼠，貓好好記性㗎，但凡佢經常捉到老鼠嘅位，佢一定唔放過。

捉老鼠之餘，都要瞻前顧後。

另外就係轉入彎位啦，要先望清楚有冇危險。

小心向前行。

覺得安全，腳步就會變得輕鬆，大踏步神情確威武。

大部分時候，我哋都係一齊返屋企嘅。
呢日，佢好有好奇心，走咗落地下停車場玩，呢個係貓gathering嘅熱點，所以佢左聞右聞，睇下有無其他貓嘅氣味。

見佢落去玩，咁我就唔等佢啦，玩完，佢自己識得返屋企嘅，好醒目㗎。