幸運貓

同三色貓出街時，久不久都有人，特別係老人家，同我講，你知唔知呢隻係幸運貓？？
是的，在德國，三色貓會被稱爲Glückskatze，即係幸運貓，因為相傳佢係會為主人帶來好運，同埋响危難裡面，特別係火災，救主人一命。
而响日本，佢哋都係最受歡迎嘅貓，招財貓就係仿照佢哋而製成，相傳以前漁夫出海，仲會帶埋佢哋上船保平安添。

聖誕節前嘅某日，無無聊聊，就去超市行下，見到有聖誕抽獎，日日都有禮物送出，反正得閒，又填吓抽獎卷啦，順手填埋王子果份。

過兩日再去，竟然發現王子個名掛咗响棵聖誕樹上面！！

其實，我冇乜大志㗎，最初只係諗住有盒朱古力都已經唔錯啦。
立刻打比王子，通知佢放工去領獎，佢响電話完全唔敢相信，因為，呢次係佢人生第一次抽到獎！！

我諗，你都好想知我哋收到乜嘢禮物啩？？？
就係呢樣嘢啦，係佢呀！

當王子攞到返屋企嘅時候，已經好肯定同我講，唔係cheap嘢喎。
呢個係藍牙speaker，我同王子之前都無留意過呢類型嘅產品，就梗係即刻check價錢同網評啦，原來呢個speaker正價要130歐羅，網評話品質好好，仲好好賣添。
其他人明明都係普通禮物，點解我哋果份咁厚禮嘅？？！！
原來咁啱我哋中獎嘅日子係Saint Nicholas Day，所以份禮物係第二獎！！

王子對呢個新玩具愛不釋手，成晚响度研究同玩。

最近，超市都有呢個speaker嘅推廣，不過淨係得黑色（因為灰色貴啲），王子見到，又諗起自己得獎，咁又開心咗一晚。

都唔知呢個係咪幸運貓嘅魔力，不過呢次中獎，真係大大改變咗王子，以前每逢我參加任何抽獎，佢都潑我冷水，話我晒時間，一定唔會中，依家呢，叫我填埋佢個份添呀。