我的網誌清單

2017年1月19日星期四

香煎糯米春卷

天氣凍,食吓糯米補身。
今日唔想食飯,淨係想食小食做晚餐,諗咗一陣,決定整煎糯米春卷。
糯米浸水兩小時,瀝去水分。
香菇浸軟,切碎,浸香菇水留下備用。
易潔平底鑊內加入糯米,香菇碎,粟米粒,甘筍碎,香菇水,鹽,少少糖,日本醬油,拌勻。
然後加入水,水加到剛剛蓋過面就足夠,拌勻。
我今日食素,所以無肉,你喜歡嘅話可以加入其他材料,例如臘腸粒,瑤柱絲等等。



加蓋,大火煮至滾起,轉中火,煮至收水,熄火,不開蓋等15分鐘。
開蓋後等15分鐘,待糯米飯涼一點。


外面冰天雪地,我無心機出去買春卷皮,於是用咗越南米紙代替,如果你鍾意,用腐皮都會好好食。
越南米紙浸一下水,拿出,等幾十秒,便會軟化。
將一湯匙糯米放上米紙,好似平時包春卷咁包好。


好快已經包咗兩碟,其實依家已經可以食,但係我想食香口嘢,所以會煎脆佢。


然後煎香佢,直至夠脆。
如果用一般春卷皮或者腐皮,佢哋遇熱唔會痴埋一齊,但係米紙會,所以落鑊之後最好先碌一碌,等米紙沾上油,而且唔好放得咁逼。


話咁快就攪掂,今晚配泰國雞醬食,其實配喼汁或者陳醋都唔錯㗎。


22 則留言:

  1. 好煮意,我都有米紙未用完,有時間要試試

    回覆刪除
  2. 咁食法我未試過,我用米紙包粉絲、紅蘿蔔絲、西芹絲和煙三文魚咋!

    回覆刪除
    回覆
    1. 我哋呢度好流行用米紙,除咗整越南嘢同泰國嘢,有時仲會用嚟整壽司

      刪除
  3. 回覆
    1. 呢個好夠飽,放啲蔬菜,就可以小食當一餐啦

      刪除
  4. 這個煮法幾好喎, 冬天我都喜歡食糯米.

    回覆刪除
  5. 我懶,直接食個飯算。

    回覆刪除
  6. 咁食法,的飯暖笠街,好呀!

    回覆刪除
    回覆
    1. 會外脆內軟,而且糯米有啲煙靱,都幾特別

      刪除
  7. 好好昧咁喎,整得好親,哩種做方幾特別,好少春卷餡料喺糯米,我like煎多啲。

    回覆刪除
    回覆
    1. 係比較少見,我其實以前都食過,不過就唔多地方有

      刪除
  8. 喱個唔錯喎又唔係麻煩,易整....
    我可能會加多啲蔬菜粒

    回覆刪除
    回覆
    1. 都得㗎,個餡料真係好睇自己口味,同屋企有乜材料
      如果唔係太懶,其實我會出去買生菜包住食,應該唔錯,又可以食多啲菜

      刪除
  9. 天寒地凍,貓咪食乜野?

    回覆刪除
    回覆
    1. 都係食貓糧同零食,呢排外面鋪滿雪,我都唔知佢有冇捉到老鼠lu

      刪除