敗物篇之去臭味鋼蛋

休blog期間，除了外遊，帶人去濕平是我重要任務之一。
據說，去味鋼蛋係依家非常流行嘅伴手禮，極受親朋戚友嘅歡迎。。
甚至我去到outlet，售貨員都同我講，中國人好鍾意買呢隻蛋㗎，次次都大手買入。
我大概太少買廚房嘢，又後知後覺，真係唔知喎。

上網睇番，台灣好似好耐之前已經有人買，香港我就唔清楚啦。
淨係知香港好似冇得賣，所以呢隻蛋，啲人會趁响德國旅遊嘅時候大手咁買，旅行團亦會推介團友買。

咁呢隻蛋有乜用呢？售貨員話，隻蛋可以去除手上嘅臭味，特別適合用嚟去魚腥味，蒜頭味同洋蔥味。

原理係乜佢就唔知喇，只知係同個物料有關。

用法係，開著水喉，唔使用番梘，洗手液嗰啲，雙手搓隻蛋一陣，隻手好大味就搓耐啲啲，一般嚟講，十幾秒左右啲味就會冇晒。

售貨員講完，我同王子都好有興趣要一隻喎，因為我實在怕切完蒜頭洋蔥後，隻手成晚一陣味！

返屋企，煮飯時，特登用手搓啲蒜頭，再用隻蛋清潔，真係work喎。

不過售貨員溫馨提示，呢隻蛋只能去味，要去油，消毒，殺菌等等，要另加清潔劑㗎。
除左呢隻牌子，單人牌都有出類似產品，不過係祖國產嘅，價錢平好多 ，有機會我會買隻比較吓。

隻蛋細細，幾輕身，價錢又唔貴，最緊要係實用，確實係唔錯嘅伴手禮。