童年回憶

辣椒蘿白對我黎講係一個童年回憶。

每逢食粥、唔夠餸、打風、無胃口都有機會同佢相遇。

仲記得第一樽辣椒蘿白購自屋企附近嘅雜貨鋪: 老闆，唔該一樽辣椒蘿白。
雜貨鋪老闆伸手上架攞一樽落黎，
用毛巾抹下啲塵，再遞俾我: 駛唔駛袋呀？
唔駛啦唔該 ，俾錢走人。

後來超市愈來愈多，青年時代覺得去超市買野係型同方便，去雜貨鋪買野係老套。

漸漸愈來愈少幫襯雜貨鋪。

亦因為醃製食品無益，愈來愈少食辣椒蘿白。

依家反而發覺雜貨鋪其實有佢獨存有的魅力同人情味。

某日記憶來襲，腦裡突然出現辣椒蘿白的獨有氣味。
想自己試整。

自製辣椒蘿白食譜:

材料﹕
蘿白 600g

調味:
鹽2湯匙
麻油 1湯匙
糖1/4杯
水1杯
豉油1/3杯
蒜茸1 湯匙
紅辣椒粒適量

將蘿白刨皮切成條狀，加鹽撈勺，
用硬物壓住蘿白1-2日(時間越長蘿白越脆)，然後用清水洗淨，搾乾水份，
將糖、豉油、蒜茸、水煮至微滾，試味，熄火，
加入紅辣椒同麻油，
待涼後加入蘿白撈勺，
醃1日，其間攪拌數次，
入玻璃樽及雪櫃保存。