越南蝦膏醬炒雜菜粉絲、日式咖哩南瓜椰菜花

今日終於有番太陽，去踩單車先。
踩咗去大型土超買菜。

9kg菜先5歐多啲。
食咗幾日肉，今日食番多啲菜平衡下先得。

有時會响亞超買定越南蟹膏醬或蝦膏醬，用黎看門口。
幾香架，用嚟煮下餸同湯粉都幾好。有啲似蟹粉架。
多個選擇嘛，唔駛食嚟食去都係嗰幾款醬料。
除咗越南、泰國都有出產呢款醬。
有樽裝同罐頭，我今次買嘅係罐頭。

越南蝦膏醬炒雜菜粉絲

加多個日式咖哩南瓜椰菜花

越南蝦膏醬炒雜菜粉絲

食譜:

材料﹕
粉絲一包
越南蝦膏醬一罐
紅椒2隻切絲
甘荀2條切絲
唐芹切條

調味:
魚露少許
糖少許
老抽 數滴
蒜茸少許
水適量

先用凍水浸軟粉絲，
下油炒雜菜至7成熟，盛起，
加入蒜茸炒香，
加入蝦膏醬、糖、老抽、魚露及水，試味，
加入雜菜及粉絲煮30秒，
熄火，加蓋焗多2分鐘。