素菜日－韓式燜南瓜甘荀栗子、雙色椒炒海茸

今日要用歐洲材料仿製韓菜呢。
南瓜用咗本地產嘅日本種Hokkaido。
栗子用咗法國L'Ardèche產嘅真空栗子。

其實我唔係栗子fans，但王子同奶奶都係。
新鮮栗子唔難買到，但咁多功夫，有時攪完一大堆，啲栗子仲要唔靚，嘥我心機！
我都買過急凍嘅，唔ok，冇哂香味仲堅硬無比。
呢隻真空栗子雖然唔係最好，但綜合價錢、品質同方便度就成為咗我嘅存倉好物！
介紹咗佢俾奶奶 ，又係深深愛上。
佢嘅保鮮期係兩年，所以响冇栗子出產嘅季節我哋都有栗子食呢。
隻栗子係原味冇添加架，只係煮熟咗，所以用黎煲湯、燜餸、整甜品都得。
市面上有唔同牌子，意大利同西班牙都有出產，大家有興趣可以留意下。

呢排成日想食海茸，加多個雙色椒炒海茸。

韓式燜南瓜甘荀栗子

食譜:

材料﹕ 

南瓜粒

甘荀

栗子 

洋葱1個切粒

調味:
韓國豉油適量
紹興酒適量
糖少許
水適量

用少少油爆香南瓜粒及甘荀， 

再加入洋葱炒勺，

加入豉油、糖、水炒勺，

加蓋，用中小火煮至南瓜粒及甘荀淋，

加入栗子煮3分鐘，試味。