一瓜兩吃－越式魚翅瓜沙律

某天又開咗個魚翅瓜。
用壓力鍋先蒸熟，去籽。
以前我也是用叉將瓜肉起出來，現在發現，只要用叉在邊沿刮出一點瓜肉來，熟咗嘅魚翅瓜皮一撕就開。

跟住用手搓下佢便成絲狀，快過用叉刮好多！

今次一瓜兩吃，第一吃是越式魚翅瓜沙律，扮越式青木瓜沙律。
青木瓜太太太貴了，貴到連本地嘅泰國人和越南人也只會小塊小塊咁買。
魚翅瓜絲爽口，用黎扮青木瓜都幾正架。
影相時發現有唔妥！

 咁先似樣嘛。

沙律汁係Nuoc Mam(碌冧)。天氣暖咗，食酸辣沙律醒胃啲！


越式魚翅瓜沙律


食譜:

材料﹕
魚翅瓜絲400g
沙律菜80g
大蕃茄1個切片
甘荀絲適量
碎花生適量
炸乾葱/洋葱片適量
碌冧適量


甘荀絲加入適量碌冧，置雪櫃醃半小時， 
再加入蕃茄及魚翅瓜絲醃半小時，試味
大碗內底部放上沙律菜，再鋪上魚翅瓜絲、蕃茄片及甘荀絲， 
灑上碎花生及炸乾葱。