自家製天然蘿蔔咳藥水

某天和鄰居一起買餸，看見佢買Black Spanish Round Radish(黑皮白蘿蔔)，有點好奇。
印象中佢屋企唔食白蘿蔔架。
原來佢個8歲仔咳，小朋友响學校又交叉感染，响流感季節經常病，一浪接一浪，仲將啲病菌帶回家，最後全家無一倖免。8歲仔晚晚咳，鄰居無覺好瞓。。。
有邊個家長想子女成日食成藥？！8歲仔學校嘅老師於是教識咗各家長自製蘿蔔咳藥水。
鄰居雙眼發光地表示: 勁work呀。

回家上網睇，真係好多德國人話掂，如果你度冇黑皮白蘿蔔，一般白蘿蔔都得架，不過黑皮白蘿蔔就勁啲。製法同洋葱咳藥水一樣。

網上睇到昔日德國報紙講各種"治咳良方"，話洋葱有袪痰作用，亦是天然抗生素。而白蘿蔔則有抗菌及減低咳嘅作用。報紙亦有提及，可以將兩者混合。呢啲自製天然藥水一日可以飲好多次架。重點係一作咳便要快啲整黎飲，否則飲嘅時間要長啲架。

兩種藥水一歲以上小朋友已經可以飲，但俾幼兒飲不要用蜜糖製、要用砂糖！

後來上網再看，原來中醫都有提及用蜂蜜與白蘿蔔治咳，能補肺益氣、理氣化痰、生津止咳，仲可以治喉嚨腫痛，同治咳嗽後嘅慢性支氣管炎。

利申: 我未有機會試蘿蔔咳藥水呀(好彩！！)，不過網上德國人說味道好過洋葱咳藥水！