下欄

今次買嘅兩種魚，都有魚下欄，三文魚有啲頭頭尾尾，pike有好多魚卵。
後來上網查，原來pike係一種出名多魚卵嘅魚。

啲洋人同日本人會將啲魚卵自製成魚子醬，我無咁勇猛啦。

啲pike魚卵唔知好唔好食，但係我又怕佢腥，但係唔煮嚟試下，就咁掉咗，又好似有啲戇居。。。有啲掙扎添。。。

咁不如照燒啦，點都唔會太腥卦。
先整咗個照燒汁，諗下諗下先記得，原來呢個係我學生時代跟日本friend學整㗎。
薑汁，日本醬油，糖，味醂，清酒，水混合，試味，屋企冇味醂清酒，用紹興酒咋。

魚卵上麵粉，半煎炸定型。
之後倒走啲油，煎煎啲三文魚。
兩樣我都係係咁意煎吓，唔駛熟晒，因為一陣仲要回鑊㗎。

咁又成大碟啦。

原鑊加入照燒汁，中大火煮呀煮。

開始起大泡泡，即係啲汁開始起糖膠，差唔多啦。

加入啲三文魚同魚卵煮煮。
中間反一次，等兩面都吸到汁，唔想散晒，反嘅時候就唔好太大力啦。

今日食魚下欄套餐呀。

健康啲嘅飯。

照燒魚卵，味道冇問題，亦都唔腥，問題係魚卵嘅質感，有啲硬，叫王子唔好食，等我做下實驗，試下將佢改裝成另一種食物。

老火湯一碗。

 醋漬西蘭花，早幾日漬落嘅。

照燒三文魚，呢個王子舔到隻碟乾淨晒。