奇異籽－免煮果醬

減磅對王子最大嘅挑戰，係無得好似平時咁食甜嘢。
於是，久不久要整啲健康甜品俾佢，免得佢典床典蓆。。。
今日用奇異籽整免煮果醬，奇異籽係呢幾年健康保健食品嘅新寵，以前只有有機健康食品店有售，依家就一般超市都有賣。

奇異籽同蘭香子好似，都係浸泡之後會發大，外面會出現一層類似西米嘅啫喱狀物質。

不過據說奇異籽嘅營養價值比蘭香子高，所以响西洋界都係流行食用奇異籽，多過蘭香子。
奇異籽有多種養分，含有高蛋白質，奧米加三同鈣，低熱量而高纖，而且奇異籽會令人有飽肚感，對減磅有幫助。

食法通常係先用液體浸泡，其實可以唔浸，不過浸過有催芽作用，有益啲。
可以用水，牛奶，果汁等等浸。
一浸，就會見到佢哋有啲黐埋，同啲啫喱狀物質會包住粒奇異籽。

浸泡大概30分鐘之後，便會發大10－15倍。
亦可以平時浸泡定放雪櫃，奇異籽好耐放㗎。
再加入生果蓉同蜜糖，攪勻。

咁就整完啦，我今日整嘅係稀一點嘅果醬，因為係用來伴食的。

晚上飯後，低脂乳酪上倒入免煮果醬，放啲粟米片，就係王子嘅健康甜品啦。

如果你係用來搽麵包，想要杰啲，咁可以唔用水浸泡，直接同生果蓉，蜜糖混合。

不過請注意，免煮果醬糖分少，又無煮出果膠來，純粹靠奇異籽嘅膠質，所以唔會有傳統果醬咁杰㗎。