新玩具之黑豆麵篇

一直諗緊買唔買麵包機，最後都係放棄咗，反而，買咗呢部全自動嘅製麵機。
隨機附送食譜，量杯同切麵刀。

收到第一日，已經即刻同王子試機，操作容易，成品我哋好滿意。
呢部機，10分鐘內可以製造出1－2人主菜份量嘅麵條來，15分鐘內可以製造出3－4人主菜份量嘅麵條。
王子去咗咖哩國出trip，外面又落雪，我留响屋企玩新嘢。
是日玩黑豆麵。
之前响有機店買咗黑豆，攞咗啲嚟磨成黑豆粉。

呢部機最多一次過處理500g麵粉，我今次食譜係1／3黑豆粉，1／3普通麵粉，1／3高筋麵粉。

按好掣，會自動拌勻啲粉，再响旁邊加入水。

其實通常幾分鐘，佢已經開始出麵，覺得夠長，就可以用切麵刀切斷。

好快啲麵就搞掂。

我唔想成日洗嘢，一次過整夠三餐麵嘅份量，存放都好簡單，灑上麵粉，用手輕輕拌勻。

入盒或者入膠袋，封好入雪柜，可以放兩至三日都無問題。

是日食日式咖喱伴黑豆麵，配最近研製緊嘅港式奶茶。

啲黑豆麵，令我諗起一零一隻斑點狗。