廢物利用之手卷篇

買魚嘅故事仲未完。
每次買原條三文魚，我都唔打魚鱗，反而會去皮，因為三文魚魚鱗要打幾哂時間，而且，我通常都係蒸或者整鍋物，無人會想食魚皮。
其實三文魚魚皮好好食，不過一定要炸！
今次好好心機地打魚鱗，再起魚皮，魚皮要帶少少魚肉，上粉漿炸脆。
未炸之前睇落好少，炸完又一大碟。

今晚我哋食手卷！
一早預備好壽司飯，仲有青瓜絲同沙律醬，整好兩大碟手卷，沖好一大壺綠茶，就同王子大啖大啖吃。
王子初頭見我整魚皮手卷，十分懷疑，哈！食完即刻大讚，三文魚魚皮响佢心目中一直係廢物，原來廢物得到好好處理，就會變上菜。
呢個菜式，响本地壽司店只係有時會見到，有時仲要係熟客先有得食，一個魚皮手卷，索價要4歐㗎。