自製天然方便湯底粉

呢幾年，少咗好多食即食麵。
好多時候，都係自己煮粉食，有時連麵都係自己整。
湯底呢，有時就會煮定啲肉湯放雪櫃，隨時有得用。
今年要少啲食肉，咁要多啲整其他湯底喇。
今日，會整個天然方便湯底粉。
材料有海帶／昆布，蝦皮，魚乾，冬菇。

材料其實可以加加減減，如果你食素，可以用幾種菇，再加啲海帶／昆布代替。
如果有需要，可以用濕布先抹一抹啲香菇。
先將啲冬菇同魚乾搣碎啲，亦可以用攪拌機代勞。
全部材料，白鑊用中火炒，炒一陣會出現少少啪啪聲，跟住略為收細少少火，繼續炒至有香味同材料開始乾身同脆，通常10－13分鐘左右便炒好。

跟住放涼，然後磨成粉，如果材料無炒好，一來唔夠香，二來好難磨得幼。
睇下幾似啲即食湯粉，不過呢個健康好多，無添加㗎。

跟住加啲鹽同糖，拌勻，可以幫助保存。
入玻璃樽，放雪櫃，就可以當方便湯底粉咁用。
煮餸，做湯底，醃肉都可以用。
不過請注意，呢個始終係天然嘢，無加任何增味劑，味道點都唔夠市售嘅雞粉，菇粉嗰啲咁惹味。
如果你喜歡濃味啲，煮嘢嘅時候可以配合少少上湯，或者味噌，豉油，感覺會惹味啲。