意大利漬茄子

某天，王子見到茄子半價，立刻向我報料，機不可失，叫佢幫我買。
我想做意大利漬茄子。
這是一個好多意大利老人家都會做嘅漬物，久不久，也會在高級嘅意大利食品店見到。
今次嘅茄子唔算大條，屬於中型，用咗其中五條。

茄子去皮切幼條，大約尾指咁粗。
準備好3湯匙嘅幼鹽。

 一層茄子一層鹽咁鋪好，然後等5小時，期間用手輕力拌一拌，重複2－3次。

然後擺好個壇，準備開工。
有已消毒嘅玻璃樽，橄欖油，蒜蓉，香草同辣椒碎。

5小時後，茄子出咗好多水，跟住要幫佢哋過三次水，每次要輕力榨一榨，等啲鹽份走返出嚟。

最後一次，要榨乾一點。

將6杯水加1杯白醋混合。

煮滾。

水滾後，放入茄子中大火煮2分鐘多一點，不能煮太耐，隔去水但無需壓出水份。

趁茄子熱，一層油，一層茄子，一層蒜蓉香草辣椒碎，鋪好，最後用油蓋住啲茄子。
加蓋，放陰涼嘅地方漬1星期以上，千萬不要心急早試味。
漬物，需要耐性，必須要等夠時間，才能將食材嘅美味發揮出來。
漬好再次打開蓋時，你會即時聞到一股濃烈嘅意大利香氣，彷彿走進一間意大利嘅雜貨舖。。。