Piri-Piri Chicken Wings

週六傍晚，經過超市，順便去睇睇有無跳樓貨。

真好，有雞翼，仲要有半價。

想起响突尼西亞帶返嚟嘅peri peri sauce仲未開封，咁不如整Piri-Piri Chicken Wings啦。
Piri-Piri Chicken Wings有個好勁嘅中文名，叫霹靂辣椒雞翼，好有氣勢啊。

呢個菜式已經响唔同國家流傳咗好耐，所以有好多不同嘅做法。
將幾片薑，4粒蒜頭，一碗莞茜，一個小洋蔥，4湯匙油攪碎。

倒入大碗，加入1茶匙鹽，1茶匙黑椒碎，1湯匙peri peri sauce，2茶匙紅椒粉，4湯匙檸檬汁，拌勻。

我的peri peri sauce來自突尼西亞，會比較辣，如果你買嘅係西洋貨，通常唔會太辣，咁可以加多啲peri peri sauce，同減少啲紅椒粉。

加入900g雞翼，最少醃5小時，最好醃過夜。

星期六晚上醃咗，星期日中午就有烤雞翼做午餐，185度焗約30分鐘便完成。
是日餐單係：黑豆粟米苜蓿芽沙律，霹靂辣椒雞翼，配番茄黑豆飯。