Sousse （3）

之前講過，舊城寨裡面嘅街道特色係似迷宮，今日去睇下。
窄窄嘅街道，有點凌亂，電線駁嚟駁去，都係特色。

呢類型嘅舊城寨，通常總會有水煙檔，就咁放一張張凳響度，店員問你食乜味，然後就會帶嚟俾你。

另外就係飲茶，所以茶檔林立。

走入茶檔睇吓，好旺場呀。
仲要係茶檔內外，全部都係男人!!! 女人。。。唔通唔俾响外面飲茶？？！！
我初頭有啲卻步，係咪女人唔入得呢？於是問老闆，佢話無所謂，叫我隨便影相喎。

突尼西亞人飲嘅係黑茶，睇下，真係有啲似我哋嘅茶餐廳沖奶茶嘅樣。

不過佢哋飲茶係唔加奶嘅，一係就齋飲，一係就加薄荷，不過就一定加糖。

另外都會賣咖啡，不過又係唔加奶。
有無留意到，水吧阿哥隻耳仔夾著啲嘢，點解啲水吧阿哥／伙記咁鍾意咁做嘅呢？？？

混完吉，再向前行。

呢區超多人，仲係超多女人。

因為呢區係賣金同首飾㗎。

不過呢啲，唔啱香港人㗎啦，而且啲金嘅品質係比較差㗎。

金器區唔啱我哋睇，我哋轉入另一條街，行行下，又見到食物區。
行下行下，我哋其實都唔知自己响邊，究竟係响東南西北邊度，因為呢度無地圖之餘，太多小路，亦無街名。

呢個樣，似乎ok喎。

本地甜點鋪頭。

香料舖之後係賣衫褲鞋襪袋果啲，呢區我哋要避開，因為會狂被搭訕，好煩，煩到有啲忟憎。

而且佢哋賣嘅嘢，基本上係一樣嘅，幾百間賣差唔多嘢嘅鋪頭，個個同你搭訕，你話幾痛苦呢。。。

遠離商業街，就會開始見到民居。