麻辣紅油三角雲吞

今日用新機試整雲吞皮。
上次唔記得講，如果你唔滿意部機嘅出品，例如覺得啲麵搓得唔夠耐，或者啲麵壓得唔夠靚，可以放返入去，叫部機重做。

用咗250g中筋麵粉，250g高筋麵粉，180g水，3／4茶匙鹼水。
如果你有手動際麵機，一樣可以整到，只係水份要加多30g左右。
落咗鹼水之後，個麵團會變得實淨冇咁黏，顏色會變淡黃。
一般街賣嘅雲吞皮會落色素，所以會黃啲，鮮艷啲，自家嘢就唔駛落啦。
部機一路出麵皮，你就可以一路切成方形，一陣就做好一大碟雲吞皮。
做多咗嘅雲吞皮撒少少麵粉，包好，放雪櫃可以保存幾日。
上次都係唔記得講，啲麵／麵皮其實都可以冷藏，灑多少少麵粉，包好就可以，解凍後就可以煮，好似街買啲急凍麵食咁。
因為呢個雲吞皮模主要係俾人用嚟做意大利雲吞，所以會比較厚，如果你想食薄餃子皮，就要自己再壓薄啲先切。

今日整三角雲吞，餡料係小菜園嘅菜，火雞肉同燕麥。

屋企啲辣椒油食晒啦，今日又整咗一大碗，今次整麻辣油。

用麻辣油調好個麻辣汁，雲吞煮好，淋上汁料，灑上芝麻，是我嘅獨食晚餐。

飯後有跟餐茶，是日餐茶係久違嘅茶走。