白松露醬燒牛仔肉，伴青豆扁豆沙律

家中仲有幾瓶松露醬，王子經常虎視眈眈，問幾時整俾佢食。
佢想食嘅，係松露醬燒牛仔肉。
天氣涼返，就整俾佢食啦。

我今次嘅方法係: 將3湯匙橄欖油，1湯匙意大利陳醋，半茶匙鹽，一茶匙黑椒碎，適量香草碎，拌勻，將大約1kg嘅牛仔肉放入拌勻，入雪櫃醃大概2小時，取出放至室溫，用100度焗爐中層焗1小時40分鐘(想食熟啲就加多10－15分鐘），取出，燒熱煎鍋至好熱，加入油，每面稍為煎煎幾十秒至有啲焦黃，取出，等5分鐘就可以切。

依然係好平均地粉紅啊。

淨係食肉一定唔得啦，點都要啲蔬菜，利用小菜園嘅青豆同沙律菜，做個沙律。
配菜係青豆扁豆沙律。
今次唔食黑松露，食白松露。
燒牛仔肉上嘅，係香氣十足嘅白松露醬。

周末嘅午餐，就係如此簡單。
王子嘅食評係：呢個煮法更勝一籌，啲燒牛仔肉非常稔滑，以後都要咁樣煮云云。。。
梗係唔得啦，次次都做同一樣嘢，仲邊有進步空間呢？！
最後一包嘅優質牛仔肉已經售罄，又要趁機大手買入啦。。。