芫荽茄子素肉卷

小菜園嘅有機芫荽，生得好瘋狂，再唔食就開花啦。
自己種嘅，一定特別珍惜，所以呢排要經常食芫荽。
自家種嘅芫荽好香，有時我只係走過佢哋旁邊，已經聞到佢哋嘅氣味。

同上次整白蘆筍素肉卷一樣，首先搓好麵筋，不過今次加入芫荽碎一齊搓。

是日屋企有個茄子，仲有啲豆要清，咁就整茄子素肉卷同豆素肉卷，來個雙併吧。。。
加咗芫荽，個外型有啲似鯪魚肉啊，其實唔單止外形，食味都有少少似，尤其係口感方面。
如果兩者比較，茄子素肉卷味道會勝一籌，茄子吸咗味，軟軟哋，加埋素肉嘅彈牙口感，好夾呢。