鮮肉生煎包

去年種嘅大蔥，種得很差。
小菜園還有幾條瘦蜢蜢嘅大蔥，冇眼屎乾淨盲，食埋佢啦。

我想食鮮肉生煎包。
大蔥，幾片薑，剁碎，加入400g免治肉，生抽，糖，麻油，鹽，白胡椒粉，攪拌至起膠，再逐少逐少加入1／4杯水，再攪拌，入雪櫃雪半小時以上。

前一晚，200g麵粉，加少少酵母，大半杯水，拌勻，蓋上蓋，入雪櫃。
第二天，見到咁嘅狀態，即係老麵成功製造啦。

大盤內加入250g麵粉，1湯匙糖，1／4茶匙鹽，拌勻，加入老麵，搓一陣之後開始慢慢加入暖水，直至成麵糰。

老麵好黐立立，所以通常唔使落咁多水。

將麵糰同鮮肉分成等份，我今次會做九個。

將一份鮮肉壓平，中間厚，旁邊薄，放上一份鮮肉。

包好，用手稍稍按平一點。

反轉，搽油，放上芝麻。

然後將有芝麻嘅一面，直接放在已塗油嘅易潔鑊上。
全部做好後，在沒有芝麻嘅一面上塗油，放上芝麻。
每個包之間最好保持一點距離，免得它們發脹時黏在一起。

加蓋，用中小火煎約15分鐘，檢查包向面嘅一方，中間是否已經變實淨，向底嘅部頒是否夠金黃。
ok就反轉再煎多10－15分鐘，至金黃。
開蓋後，煎多一兩分鐘，反轉再煎多一兩分鐘。

煎好，唔好即刻食呀，好熱㗎，等一兩分鐘先好開始食啊。

如果你鍾意薄皮同脆口，可以將麵皮壓薄啲，就會有呢種口感。

如果你鍾意食到啲包包，咁唔好壓太薄，就會有呢種口感。

我呢，兩種都有整！