素肉串燒

是日又係食素，來個新煮意，今次食串燒，伴合桃青瓜沙律，主食係菜飯。

420g麩質蛋白粉（vital wheat gluten flour）+70g普通麵粉+一茶匙蒜粉+半茶匙黑椒粉，拌勻。
一大杯水内加入2／3茶匙鹽，2湯匙豉油，1茶匙糖，1／4茶匙老抽，拌勻。

慢慢加入粉內，搓成一團，唔夠要另外加水，搓到麵糰唔再吸水，蓋上布，等15分鐘。

大鑊內放入四大杯水，1茶匙鹽，2湯匙豉油，1／4茶匙老抽，煮滾後轉最細火。
用水濕下剪刀，再將麵糰剪成塊（約2cm x 2cm)，直接放入液體中。
完成後轉大火，煮滾後轉中火，加蓋煮10分鐘，不開蓋，焗10分鐘。

取出放涼，我今次做嘅素肉份量頗多，夠食幾次啦。
準備汁醬，我今次嘅汁醬係1湯匙甜麵醬／海鮮醬，1湯匙花生醬，1湯匙豉油，1湯匙水，拌勻。
將素肉與菠蘿，車喱茄串好後，兩邊掃上汁醬，240度最上層焗8－10分鐘便可。