新派煮厚牛扒方法 reverse sear

去梁九記有個好處，佢好專業，每個部門有專才坐陣，我試過唔知某食材點用，佢即刻揾專才答我，仲解得好清楚。
仲有個古怪現象，每次我去巡，都會撞到啲身光頸靚嘅男人黎買1塊牛扒俾自己食，仲好細心咁選扒，再去選酒，但係我從未撞到女人咁做，典解呢？？？
响梁九記買乾式熟成牛扒時，有個貼心服務，就是包裝上有煮牛扒嘅方法。
呢個方法係新派方法，又分享下。

呢個方法同傳統方法分別好大，傳統方法係先用超熱pan將兩面煎至有點焦(即係sear)，再入焗爐高温焗。
新派方法叫reverse sear，係先焗後煎。
例如呢塊800幾gram嘅厚牛扒，先放牛扒至室溫，約1小時。
預熱焗爐至90度，牛扒兩面用以鹽及黑椒碎調味，放在烤架上，再以90度焗30分鐘，然後用高温煎或燒佢，每面5分鐘。

睇下，用呢個方法個扒嘅粉紅色好均勻，冇出現「三及第」－出面乾硬、中間粉紅、個心生嘅狀態。

呢個方法有幾個好處：
1. 焗爐抽乾牛扒嘅水，煎時冇出水情況。
2. 先用焗爐低温烤牛扒，令佢慢慢均勻受熱，入面生熟程度較统一。
3. 烤過嘅牛扒微熱，須煎至有點焦嘅時間大幅減少，所以外面唔乾硬。
4. 切牛扒時冇血水滲出情況。


有機會要試試喔！