麻辣雞煲

法國粟米雞又減價，今次一口氣買3隻。
今日先食一隻。
食麻辣雞煲，好唔好？
雞一隻（1kg）斬細件，用少少生抽，白胡椒粉，黑胡椒碎，醃半小時。
醃料唔好重手，因為麻辣雞煲個醬好重口味㗎。

準備好啲配料。

燒熱煲，少少油，中火炒薑片蒜頭至有焦黃。如果有蔥頭可以加，會仲香，不過我屋企冇，冇得落。

加入香料，我加咗花椒，八角，桂皮，甘草，乾辣椒，草果，炒香。

加入雞件，煎香一面，反轉再煎香另一面。

加入洋蔥同汁料，汁料係1湯匙磨豉醬，1／2湯匙海鮮醬，1湯匙豆板醬，拌勻。

炒呀炒。

加入紹興酒一大碗，孜然粉，中火煮約12－15分鐘，至雞熟。
此時，廚房應該香氣彌漫。
根據喜好，加啲老抽調色。

最後加入大部份唐芹同一半莞茜，拌勻，熄火。

食前再鋪上餘下唐芹同莞茜。
唐芹同莞茜都係小菜園嘅出品，吸咗汁，好好味呀。

以往，次次有飯剩。
今晚，出現咗唔夠飯食嘅情況，久違了。