San Gimignano （1）

如果說Siena係一個野心嘅故事，那麼，San Gimignano就係一個爭嘅故事。

一大清早就到，天氣好好呀！

時間尚早，山城嘅街道清淨又舒服。

San Gimignano最大嘅特色係呢啲突然高出嚟嘅塔樓。

山城嘅另一特色，即使人口好多，廣場都係細細嘅，因為當時嘅政府十分害怕發生騷動時，控制唔到。

講返呢啲塔樓，點解會咁呢？
因為要爭！

曾經一時，San Gimignano 嘅貿易好發達，出現咗好多有錢商人，呢啲塔樓係以前富貴商人嘅屋企，下面係做生意嘅，上面係睡房，最頂層係廚房。
為咗炫富，於是將間屋起高啲，個個想爭做第一，你今年起高啲咩？我出年一定起得高過你。。。
爭嚟爭去，啲塔樓越起越高！
塔樓本來有72座，依家只剩下13座。
剩下啲塔樓，大部分仲係啲後人住緊，據說，起到咁高，其實唔好住又唔方便。
爭嚟爭去，最後辛苦咗自己。

“夫唯不爭，故天下莫能與之爭。”，真係有啲道理㗎。

其實呢啲塔樓，係第一代嘅宮殿，因為係石造，興建成本好高，而且室內嘅限制好大。
後來出現咗用磚造屋，靈活性大咗好多，而且美觀，於是有錢人無再起塔樓，不再向上發展，興起咗建宮殿，向橫發展。

講完古，再去睇下呢個古城。

又見一棵富貴柿樹，好想摘嚟食呀！

山城外嘅風景，其實好靚架。

塔樓引咗唔少雀鳥响樓頂結集，久不久就會响天上飛一飛，好壯觀！