雜菇魚麵筋扒翠玉瓜

王子有酒局，我一個人食飯。

一個人唔使搞咁多，有碟小菜，有碗老火湯，有碗飯，就夠啦。
是日小菜係雜菇魚麵筋扒翠玉瓜，我好鍾意食呢類型嘅食物。

冬菇浸好，切絲，鑊內加油，放入薑片蒜蓉炒香。
加入冬菇絲炒炒，加入水及少許蠔油煮一會，加入滑子菇（或者用蘑菇）煮一會。
另起鑊，用蒜蓉及鹽炒熟翠玉瓜。
魚麵筋加入滑子菇汁内煮一會，加點老抽，鹽及糖，試味，用生粉水埋芡，加入少許麻油，舖在翠玉瓜上。