魚麵筋

呢排天氣凍咗，成日想食熱辣辣嘅湯麵。
除咗火雞丸，魚麵筋都係好好嘅湯麵配料。
魚麵筋可以用平價魚例如鯇魚整，亦可以用鯪魚肉整，冇嘅話可以用急凍白魚柳，我兩樣都無，用咗屋企有嘅急凍三文魚碎。
800g魚肉切一件件，雪凍，用攪拌機打碎。

加入蛋白5隻，4湯匙生粉，1／3湯匙鹽，1／2湯匙糖，1湯匙薑蓉，1／3湯匙白胡椒粉，泡打粉適量，1／3杯水，用攪拌機再打數分鐘。
完成後，質感應該似半溶嘅雪糕。
鋪上保鮮膜，入雪櫃雪1小時。

燒熱油，用兩個匙羹推啲魚麵筋糊落油，每個魚麵筋大概需要1／2匙羹魚麵筋糊，用中大火炸至兩邊金黃。
魚麵筋會膨脹，而且好快就熟。

唔使好耐，已經炸好一大盤，呢度夠我同王子食4－5次啦。
炸完之後，啲魚麵筋好快又會縮番細。
新鮮炸好嘅魚麵筋好好食，不過都好熱氣。
外脆內軟，有啲似麵筋，豆卜，不過因為有魚肉，會有炸魚片果種香氣，非常似順德嘅魚腐。
刻意早一點炸好，如果晚飯時間炸，不得了，我一定制止唔到王子係咁食。
點知王子早咗返！！！
看見新鮮炸嘅魚麵筋，立刻嚷著餓，要吃一點。。。
於是幾件新鮮魚麵筋，加一杯冰凍有機豆漿，成為咗佢嘅下午茶。

魚麵筋放涼就可以分成一份份入袋，入冰格冷藏保存。
晚餐整咗手工麵，加埋魚麵筋同蔬菜，一人一碗湯麵。

魚麵筋裡面就係咁， 淋淋哋有氣泡，真係有啲似麵筋㗎。
放咗湯嘅魚麵筋無咁油膩又唔會熱氣，而且會吸湯，好啱我口味。

淨咗啲蛋黃呢？我用嚟整燉蛋。
點知有人話想玩下把火槍，於是，變咗中西合璧嘅焦糖燉蛋。

滑滑嘅蛋，配脆脆嘅焦糖面，今日晚餐幾豐富啊。