梅菜扣肉

我很少買豬腩肉，煙肉之類都很少吃。
某天晚上，夜購時碰上它們。
實在太便宜啦，而且仲係五花腩呢。。。。。。

回到家中，立刻準備整梅菜扣肉。
豬腩肉一件大概1kg，用1／4茶匙鹽醃醃，豬皮部位搽上少少老抽。

大火，用少少油，煎煎豬皮。

見豬皮顏色變成咁，便可略略煎煎另外五面。

煎好後，將豬腩肉放在器皿內，豬皮向底。
如果你想上碟時係一件件，這時可以先將佢切件／塊。
我打算原塊肉上碟，所以唔切啦。

甜梅菜用水洗洗，浸10分鐘，加入幾片薑，用攪拌機攪碎。
如果無攪拌機，可以用手切碎。
完成後嘅梅菜十分好吃，而且梅菜會縮水，所以梅菜要用多一點啊，我用了一斤呢。
原鑊內加入梅菜，炒炒。
加入少少紹興酒，炒炒。

加入水，生抽，老抽，糖，水份落多少，視乎你想要多少汁。
煮滾後，試試味，應該是甜中帶點鹹。

然後熄火，將梅菜舖在豬腩肉上，倒入汁液。
跟住係最費時嘅工序，將豬腩肉放入壓力煲內，蒸1小時，再焗1小時。
待涼，入雪櫃。
隔天，取出，放入壓力煲內，蒸1小時，熄火，再焗1小時。
然後檢查豬腩肉是否夠腍，這兩塊豬腩肉有三吋，頗厚呢，所以我一共蒸焗咗三次。
如果你喜歡爽口一點嘅梅菜，可以在第一次蒸焗時只加入汁料，第二次或者第三次蒸焗才加入梅菜。

完成後，先倒出汁液，再將器皿反轉，然後將汁液淋上面。

這一種燉肉嘅方式，很費時，但能令豬腩肉嘅肥膏慢慢溶化，肉同脂肪變得腍滑，但係肉汁依然豐富。
輕輕一撥，肉已經散開，肉汁馬上如泉湧，直奔向下面嘅梅菜。
梅菜吸收咗肉汁，成為係好吸引嘅下飯菜。

這一晚，我家要煮一大煲飯呢。