椒鹽蠔菇

某天夜購，大量蔬菜生果大平賣，其中一樣，係蠔菇。
蠔菇我們久不久都買到，但係價錢就較高。
超級新鮮啊，一啲跳樓貨感覺都無，買咗四盒，打算食兩盒。

是日食素，其中一味菜式，係椒鹽蠔菇。
6－7湯匙麵粉，加入少少鹽，少少泡打粉，逐少加入水拌勻，個粉漿要厚一點，新鮮菇菌類會出水，太薄嘅粉漿係唔work嘅。
等30分鐘以上。
後來想想，250g蠔菇已經可以炸出一大碟，都係用一盒夠啦。

期間，可以準備定啲椒鹽，1／3茶匙辣椒碎（我用咗韓國辣椒碎），1／3茶匙糖，1／4茶匙鹽，1／4茶匙黑椒碎，拌勻。
將蠔菇放入粉漿，拌勻，再放入油內用大火炸。
如果你唔鍾意用太多油，半煎炸都得。
兩面炸到硬身，有啲金黃，就ok啦。
趁熱，灑上椒鹽，就完成。

香口嘢，唔知啱唔啱你口味呢？