貓兒說愛我

昨天說到三色貓帶咗老鼠返屋企，好多人第一個反應係，佢係想送禮物俾我哋。
其實，原來貓嘅心理分析，係完全另一回事呢。

貓嘅基因內，好神秘地存在咗一股打獵嘅心，即使係從小到大都係養在家中嘅貓，只要將佢放出去，見到老鼠，佢一樣會學識點樣去捉。

呢種嘅基因，即使係佢哋已經變咗家貓，有貓糧食，生活安逸，一樣唔會消失。

但係如果隻貓係跟貓媽媽生活過，貓媽媽就會搵機會教識佢哋關於打獵嘅秘技，開始嘅時候，會帶一隻死咗嘅返來，引起佢哋學習嘅興趣，當貓媽媽覺得啲貓仔夠醒目掂當，就會帶一隻活嘅返嚟，响小貓面前玩弄一番，其實係教導小貓一啲技巧，跟住就會叫佢哋自己實習。

Copycat嘛，咪就係咁囉。

如果無跟貓媽媽生活過嘅小貓，到佢做媽媽嘅時候，呢個基因亦會浮現出來，佢會主動教自己嘅小貓。

好似好殘忍咁，但係其實，呢個係佢哋生存要有嘅特質，一直保存著，唔知邊一日落難，可以保佢一個萬全。

咁點解佢要帶返屋企俾主人呢？其實，除咗係想炫耀自己嘅真功夫，分享食物，仲係想教識主人，打獵係好重要，否則佢怕主人會餓死，係貓守護主人嘅表現。

其實，只要係隻貓緊張，想保護嘅人，佢都會咁做，未必一定要係主人。。。

貓同狗唔一樣，表達愛意無咁明顯，呢個係佢嘅其中一種方法。

如果佢帶隻生嘅返嚟，則係代表佢打獵嘅時候，其實係一心諗住我哋，所以無將老鼠殺死，反而係從老遠特登帶佢返屋企，其實係講緊我愛你。。。

係咪好warm呢？？所以，雖然三色貓攪咗壇嘢被我同王子，我哋都係嬲唔落㗎。