泰式沙甸魚炒豆

响超市見到跳樓貨茄汁沙甸魚，突然間想起一個好耐冇食嘅餸。
係一個泰國嘅家常菜，一個泰國朋友煮過比我食，一般會用嚟炒芥蘭，屋企冇，改用時令嘅豆都唔錯。

、
豆洗乾淨，切小段。
燒熱鑊，加入少少油，中火炒啲豆2分鐘左右。

撥開中間，放入一隻一開二嘅辣椒，如果你唔食辣，可以唔落。
如果你食得濃味，可以加啲蒜蓉，我今日想食沙甸魚嘅香味，唔加蒜蓉啦。

加入一小罐茄汁沙甸魚，用鑊鏟將沙甸魚壓碎，炒勻，加入少少水，炒炒。

加入少少魚露同糖，如果豆仲係硬，就要再加少少水炒炒，直至豆開始淋，改大火，炒幾下，收乾啲汁，就可以上碟喇。
呢個香噴噴，有啲鹹魚／煨魷魚果種香味。

今日兩餸一湯。

粟米素湯，好甜。

泰式沙甸魚炒豆，好惹味，好好送飯。

仲有番茄薯仔紅椒燴火雞肉丸，啱晒王子呢個撈汁怪。