湯渣再循環

小菜園嘅一角種咗啲紅菜頭，唔係太大隻，係今年春天開始種植嘅。
我想種其他嘢，於是整理咗佢，準備煲個素湯。
材料都唔少㗎，有紅菜頭，紅菜頭葉，甘筍，眉豆，栗子同腰果。
望住啲湯渣，心裡好清楚，王子一定會唔鐘意食，佢會覺得淡茂茂。
但係一堆湯渣唔食，真係好可惜，於是，來個佢一定會讚好味嘅循環再煮。

湯渣放入鑊內，加入一罐番茄，半罐水，蒜粉（無可以用蒜蓉），炸洋蔥片，醬油，少少糖，用中火炆煮10分鐘左右，期間可以用鑊鏟將啲大塊嘅湯渣分成細塊啲，試味。
因為呢堆湯渣已經冇乜味，所以啲提味嘅蒜粉同炸洋蔥片，調味嘅醬油，都要落多啲啲。

跟住加入花生醬，拌勻，加蓋，熄火。
加咗花生醬，個醬汁會濃同杰好多。
有時間嘅話，最好將佢放一陣，等啲材料入味啲，晚餐時分才加熱。

是日晚餐，紅菜頭素湯，小麥糠飯，番茄花生醬炆湯渣，仲有車喱茄海藻沙律。
果然，王子覺得個炆湯渣好好味，好過清湯嘅多多聲，而且，仲覺得個樣似一般嘅西洋素食燉菜添。。。
等咗一陣嘅炆湯渣，食材嘅味道會同提味調味料融和得好啲，因為有紅菜頭，顏色都會由紅色變咗桃红色。