寧靜小屋

某些時候，貓貓會表現出有壓力，會顯得好心緒不寧。
三色貓都試過係咁，好明顯，係安靜唔到落嚟，或者係突然覺得無安全感，周圍匿埋。
於是，睇完有關研究同資料之後，我決定為佢整間寧靜小屋。
家中有大把紙皮箱，某周日早上起來，趁著佢出去玩，就幫佢做間紙皮屋仔。
其實我最討厭畫公仔同做手工，好少做呢啲嘢，手腳好慢，搞咗我好耐呢。

起初佢只係望下，聞下。
過咗幾日，佢開始响個箱上面坐。
跟住，就開始用頭磨擦間屋，表示呢間屋係佢嘅。
再後來，久不久，就開始入去瞓覺同休息。
依家，佢已經知道，呢間寧靜小屋係佢嘅物業，如果我移動小屋，佢會好緊張。

寧靜小屋俾到佢藏身嘅感覺，令佢有安全感，我在裡面放入特厚嘅咕臣，讓佢在裡面，可以享受一個寧靜，軟綿綿嘅休息時間。
睇下，個咕臣幾厚！仲厚過佢！！呢啲先係高床軟枕嘅生活丫嘛。