掘薯樂

小菜園嘅其中一角，種咗一堆薯仔，其中一棵，就係之前有果實嘅一棵，已經枯死到七七八八，又係時候享受吓掘薯樂啦。
一路掘，便會有薯仔浮現出嚟，好有趣，好有尋寶感覺。

有blog友話未見過薯仔花，又影吓囉，呢隻花係白色嘅，有時都會有紫色嘅。

一兩棵通常夠食啦，已經有咁多，都有差唔多兩斤㗎。

掘出嘅薯仔立刻用來準備午餐，薯仔洗乾淨，切成薯仔角，浸水大概一個鐘，中間輕力洗吓佢幾次同換吓水。
跟住隔去水，將水份抹乾。

加入多一點嘅油，你喜歡嘅調味粉（我用咗摩洛哥調味粉），香草，鹽，黑椒碎等等，拌勻，鋪在焗盆內，220度焗30－35分鐘，直至佢脆。
小菜園嘅香草生得好茂盛，於是，我瘋狂咁落！！

是日嘅午餐，焗脆薯角，伴茄汁同黑椒沙律醬。