冬菇雪耳木耳粟米水餃

上星期天氣極惡劣，日日落雨，氣温由三十幾度跌到十幾度。
凍凍地，突然間好想食湯水餃。
拿拿淋去浸冬菇雪耳木耳，跟手去買碎豬肉。
冬菇雪耳木耳切碎，爆香薑茸蠔油，加入冬菇雪耳木耳碎及少許生抽，煮幾分鐘，盛起放涼。

加入粟米、碎豬肉、調味同生粉。

攪勺至起膠。

水餃皮我自己用手搓，點整可以睇番舊post。
可能整得多又密，依家越整越快，變咗熟手女工，一陣已經包咗50隻。
部份即食， 部份入冰格。
前幾日煮咗煲高湯 ，所以冇用現成湯底。
等王子跑完步返黎，煮熟水餃，加入高湯就食得！

凍凍地食碗熱水餃真係盞！