自製伴麵酸菜

食紅燒牛肉麵，我鐘意自製伴麵酸菜。
我唔係特別愛酸味，太酸我會怕，亦怕酸嘅刺鼻，所以我會將佢調到微微酸，啱自己嘅口味。
不過無可否認，酸味同濃味、有點肥嘅餸菜係夾架。

我用的是泰國酸菜，好多時都唔使錢，因為亞超有時會送幾包俾我。如果你喜歡，用其他酸菜都得。

除咗伴麵，仲可以伴豬手飯、紅燒肉飯，或者做湯例如酸菜魚片，又或者加點肉末同炒，成為另一道小菜。

做好嘅酸菜，最好不要立刻吃，等佢嘅味道更融合才吃。

也可以做多點，入雪櫃慢慢吃呢。


自製酸菜


食譜:

材料﹕
酸菜1包約300g
蒜茸1湯匙
辣椒碎1/3湯匙
油1湯匙


調味:
鷄粉1/4湯匙
糖1/2湯匙
鹽少許


酸菜用熱水煮5-10分鐘，試酸味，
沖水印乾，再切碎，
不加油用中小火炒酸菜碎，至酸香味出來，
鑊中心撥開空位，加入油、蒜茸及辣椒碎，
加入鷄粉、糖、鹽炒勺，試味。


如果你對鷄粉有抗拒，可以用加多少少鹽代替。